नगुमा उलेज्या व गुथिया टिशर्ट पिथने ज्या:

०८१/कार्तिक/१३,

थौं नेसं ११४४ कौलागा द्वादशी मङ्गलबा: (बिसं २०८१/कार्तिक/१३ गते मङ्गलबार) कुन्हु श्री दिगुख्य: गुथी, ज्यासना पुचः पाखें गुथीया संरक्षक पुचःया नायो मोतिकाजी तुलाधर, संरक्षक पुचः, कव: थाकुली/प्रतिनिधि व मिसा पुचः या पाहां सुई कव:थाकुली/प्रतिनिधि नाप दथु मुंज्या, वैगु न्हुदं नेसं ११४५ या भिं/न्ह्यैपु लसताय भिन्तुना कालबिल नापं न्हुदं नेसं ११४५ या नगुमा उलेज्या व गुथिया टिशर्ट पिथने ज्या: क्वचायेकुगु जुल।

गुथिया थगु हे छें न्ह्यागु ज्याझ्वसं लसकुस न्वचु ज्यासना पुचःया नाय: भाजु ताराविरसिं तुलाधरं बिया लिपा नगुमाया उलेज्या व टिशर्ट पिथने ज्या संरक्षक पुचःया नाय: व ज्यासना पुचःया नाय भाजु पिंसं याना दिल। वं लिपा छ्यान्जे भाजु बिजयरत्न तुलाधर पाखें ज्याझ्वसं ब्वतिकामि सकसित ज्यासना पुचःलं वंगु खु:ला दुने क्वचायेकुगु ज्याझ्व: व ल्यंदनिगु ज्याझ्व:यात कना द्युसे कजी भाला कथं न्ह्यागु नगुमा व टिशर्ट पिथनाया खं कना द्युसे नगुमा पिथनेया निंति ग्वाहाली याना दिईपीं ज्यासना पुचःया दुज:, बिज्ञापन दातापिं सकसित सुभाय ब्युसे कव: थाकुली/प्रतिनिधि पाखें अनुमोदन कायेगु ज्यानं जुल। वं लिपा भिन्तुना न्वचु बिईगु झ्वलय संरक्षक पुचःया छ्यान्जे स्वयम्भुरत्न तुलाधर, दांभरी भाईकाजि तुलाधर, दुज: प्रा निर्मल मान तुलाधर, मिसा पुचः नकीं प्रेमहिरा तुलाधर, कव थाकुली दुने ब्वतिकामि थाकुली रत्नबिरसिं तुलाधर व प्रतिनिधि पाखें रोशन तुलाधर पाखें भिन्तुना न्वचु बिया दिल। दकले लिपा पुचःया न्वकु भाजु बिद्या सागर पाखें सुभाय न्वचु बिया दिल।

व हे नापं थौं पिदंगु उगु नगुमायात गुथीया सकल ज:पिनिगु छेंखांपतीं थ्यनेमाया आज्जु तसे थनिंनिसें हे छिस्करया कव प्रतिनिधिया ल्हाती थ्यंके ज्या: न्ह्यागु दु/आपालं पुवंगुनं दु। उकीं इलं लाथे छिस्करया कव: प्रतिनिधि यात स्वापु तया नगुमा कया दिसंया ईनाप याना।

दकले लिपा, वैगु न्हुदं नेसं ११४५ या भिं/न्ह्यैपु लसताय जिपिं ज्यासना पुचःया सकल पाखें गुथीया सकल थाकुली/प्रतिनिधि, संरक्षक पुचः नापं सकल ज: दुज: पिंत आपालं आपा भिन्तुना ब्युसे छिस्कर व छिस्करया सकल छें ज:पिनि भिं सुसा: नापं उसांय बल्लासे ता:आयु दयेमाया भलसानं कयागु दु । सुभाय !!

थौं क्वचागु ज्याझ्व:यात ज्यासना पुचःया दुज: बिद्यारत्न तुलाधरं न्ह्याका दिईगु जुलसा नगुमा पिथनेया निंति डिजाईन/ले-आउट या भाला जुजुरत्न तुलाधर, नगुमाया निंति मदयेक मगा:गु दिँ/तिथि/नख:चख:या ग्वाहाली पौभा सायमी पाखें व टिशर्टया निंति गुथिया ल्यु दांभरी दिपक दास तुलाधर व छापे यायेगु निंति छत्रपाति स्वांछपु गणेद्योया सरजु श्रेष्ठ नापं ज्याकु ज्याकमि उदय शिलाकार या ज्व:मलागु ग्वाहाली जुल। वयेकपीं सकसित अल्याख सुभाय/साधुवाद।